Runik, Skenderaj – 20 gusht
 
Me inicimin e Nëndegës së RDK-së në Bashkësinë Lokale të Runikut, të enjten pasdite në këtë bashkësi, kryetai i Komunës, z. S. Lushtaku me bashkëpunëtorë, kanë mbajtur një debat me qytetarë lokalë, gjatë të cilit ka njoftuar për angazhimin e pushtetit për zhvillimin e projekteve që janë realizuar apo janë duke u realizuar, si dhe ka dëgjuar hallet dhe shqetësimet e banorëve, që kishin të bënin kryesisht me përmirësimin e jetës.

Pjesëmarrës kanë qenë krerët më të lartë të Komunës, kryetari Sami Lushtaku, kryetari i Degës së PDK-së dhe deputeti i Kuvendit te Kosovës Ramadan Gashi, zëvendëskryetari Ymeri, kryesuesi i Asamblesë Komunale, drejtorët komunalë, zyrtarë nga Zyra për Informim pranë KK-së, etj. Abdyl Ymeri, nënkryetar, fillimisht i njoftoi qytetarët me projektet që janë realizuar gjatë këtij mandati qeverisës, duke përmendur infrastruktura rrugore, ndërtimin e shkollave dhe krijimin e kushteve më të mira në shëndetësi. Përmendi asfaltimin e rrugës "Nëna Terezë", "Bajram Zena", "Zahir Pajaziti", "Selman Vojvoda", hartimin e Planit Zhvillimor dhe Urban, gjelbërimin e qytetit, ndërtimin e shtratit të lumit Klina, të trotuarit në rrugën "Osman Geci", etj. Njoftoi gjithashtu se është duke u ndërtuar shkolla fillore në Turiqevc, rinovimin e QKMF-së në qytet, është në fazën e tenderimit ndërtimit të objektit të ri komunal, janë rinovuar të gjitha shkollat ku ka qenë nevoja. "Në fazën e dytë kemi zhvillimin e këtyre projekteve: asfaltimin e rrugës, Polac-Prekaz, rruga Llaushë-Përroi i Keq, rruga në Tushilë, Izbicë-Leqinë-Runik, rruga për Radishevë, për Kuqicë, për Kotorr, Tërnafc, Kryshefc, Gofile, Qirez, Lubovec, Vojnik, Ozdrin, etj", ka thënë Ymeri, ndërsa foli edhe për infrastrukturën shkollore, duke përmendur shkollën e Klinës së Epermë e cila është në proces të rindërtimit, Qirezit, Skenderaj, pastaj shkolla profesionale, ndërtimi i së cilës do të fillojë me 1 shtator. Qytetarët lokalë kërkuan nga pushtetarët të investojnë në rregullimin e sistemit të kanalizimit, ujësjellësit, infrastrukturës elektrike, krijimin e hapësirave për rekreacion, etj.

Kryetar Lushtaku ka siguruar qytetarët e Runikut se qeveria komunale është duke u angazhuar maksimalisht për zgjidhjen e problemeve të Runikut, por edhe të fshatrave të tjera të komunës së Skenderajt. “Mos harroni se ato që nuk janë bërë për 60 vjet, nuk mund të bëhen për dy vjet”, ka thënë kryetari, sipas të cilit gjatë mandatit aktual, janë investuar 22 milion euro në gjithë komunën.

 Arkëtimi i borxheve nga bizneset në komunën e Skenderajt, në dy muajt e fundit është shtuar për më shumë se 3 herë, por megjithëkëtë shuma e borxheve të papaguara mbetet jashtëzakonisht e madhe.

“Edhe pse gjatë dy muajve të fundit arkëtimi i borxheve është rritur për më shumë se 3 herë (nga 27.682 euro në 100.994 euro), borxhi i bizneseve ndaj komunës, së bashku me borxhet e taksapaguesve të vegjël, është rreth 700 mijë euro”, ka treguar Mehmet Berishës, drejtor i Drejtorisë për Ekonomi, Financa dhe Zhvillim.

Në këtë drejtori kanë potencuar se në rritjen e arkëtimit të borxheve rol vendimtar ka luajtur formimi i një komisioni të posaçëm për ketë qëllim, i cili do të vazhdojë të angazhohet në ndihmë inspektorëve komunalë edhe në të ardhmen. 

Sipas drejtorit të financave komunale, nëse nuk kryhen obligimet ndaj komunës, atëherë ato biznese do të mbyllen përkohësisht. Si pasojë e mospagesës së borxheve ka rënë shkalla e arkëtimit të të hyrave vetjake, për pjesën e parë   të këtij viti, për 12 për qind në krahasim me të njëjtën periudhë të vitit të kaluar.